Postuar më: 22/06/2021

Fjala e ministrit Majko në “Takimi i mësuesve në Diasporë”

Të nderuar znj. ministre e Arsimit të Repubikës së Shqipërisë dhe të Kosovës, e nderuar znj. zv.ministre e jashtme e Kosovës dhe përfaqësuesja e MPJ, kolegia dhe mikja jonë që nga fillimi i reformës shtetërore për diasporën. Sot është një takim pak në kushte të ndryshme online me mësuesit dhe mësimdhënësit në Diasporë. Për shkak të emergjencë virusale i jemi shmangur traditës për ta zhvilluar këtë takim në Shqipëri ose Kosovë po mendoj se në kushtet që ndodhemi secili ka mirëkuptim për këtë çështje. Ky takim vjen pas një vargu hapash të rëndësishëm, pavarësisht se në kushtet e epidemisë, të dyja shtetet dhe Shqipëria dhe Kosova kanë ruajtur komunikim të qëndrueshëm lidhur me marrëdhëniet që duhet të ndërmarrim përsa i përket mësimdhënies në diasporë. Ajo që është e rëndësishme është që marrëveshja po aplikohet në mënyrën më të shpejtë të mundshme.

Tani jemi në fazën e miratimit të teksteve. Mendoj se kemi nisur këtë punë duke pasur vetëm një abetare të përbashkët dhe aktualisht po punojmë që me shpresë pasi është në dorë të ekspertëve dhe atyre që ia dinë kësaj pune vitin tjetër arsimor, jo në shtator të këtij viti po tjetrit të nisim punën me librat e rinj të përbashkët për mësimdhënien në diasporë të miratuar nga të dyja ministritë e Arsimit në Shqipëri dhe Kosovë. Mendoj se ky është një nga revolucionet e vogla të padukshme që sidomos e ndjejnë dhe ndjehet nga ata që janë protagonistët e vërtetë të këtij takimi, mësuesit në diasporë. Dëshiroj të kem një përshëndetje të veçantë përsa i përket një strukture të re të sapokrijuar me vullnetarizëm, dhe pastaj në fazën e dytë që bën pjesë dhe e strukturës shtetërore, Këshilli Koordinues i Arsimtarëve në Diasporë me përfaqësues nga të gjithë trevat shqiptare dhe të cilët janë pjesë e pandarë e bashkëpunimit, diskutimit për interesat që sigurisht nuk mund të diskutohen thjesht dhe vetëm me një takim vjetor.

Ky këshill mban komunikim permanent me mua, QBD dhe institucione që e konsiderojnë të arsyeshme dhe është një vlerë e shtuar e bashkëpunimit mes Shqipërisë dhe Kosovës për arsimin në diasporë. E rëndësishme të thuhet që Shqipëria dhe Kosova kanë nisur të koordinojnë politikat e arsimit, prej kohësh mësuesit nuk po ankohen që nuk u shkojnë librat. Kam përshtypjen se QBD konkurron me MASR këtu në Shqipëri pasi librat në diasporë mbërrijnë përpara atyre këtu në Shqipëri, pavarësisht se bëhet fjalë për distanca të ndryshme. Një konkurrencë e dobishme që duam ta ruajmë. Për më tepër mendoj se fjala do tu takojë ekspertëve përfaqësuesve të ministrive të Arsimit por dëshiroj të shpreh mirënjohje dhe respekt për grupin e ekspertëve, Këshillin Koordinues të Arsimtarëve në Diasporë dhe në veçanti për personelin e QBD për punën e kryer deri më sot. Jam shumë i kënaqur që marr pjesë në këtë takim vjetor të përbashkët mes Shqipërisë dhe Kosovës për mësimdhënien në diasporë. Ju uroj gjithë të mirat dhe një takim sa më të suksesshëm.